(កណ្ដាល)៖ បើតាមប្រភពដែលអង្គភាព Preab Messenger Tv ទទួលបាននៅថ្ងៃទី២៦ ខែមករា ឆ្នាំ២០២៥នេះថា មានរបងថ្មរឹងមាំកម្ពស់ជាង ៥ម៉ែត្រអត់ច្បាប់បានកំពុងផុសឡើងយ៉ាងងងើលបង្អួតអ្នកភូមិត្រពាំងកំភ្លាញ ឃុំទួលព្រេច ស្រុកអង្គស្នួល ខេត្តកណ្ដាល។

បើតាមសេចក្ដីរាយការណ៍បានឲ្យដឹងថា ម្ចាស់ដីនិងរបងថ្មរឹងមាំខាងលើនេះ គឺជាមនុស្សពិបាកនិយាយគ្នាណាស់ ហើយការធ្វើរបងថ្មក្រាក់នេះក៏មិនបានសុំច្បាប់នៅឃុំនោះដែរ។

មជ្ឍដ្ឋានបានលើកឡើងថា តើម្ចាស់ដីនិងរបងថ្មរឹងមាំខាងលើនេះ គាត់ជានរណា មកពីណា មានតួនាទីអ្វី ឬមួយទើបចេញពីព្រៃ បានជាមិនស្គាល់ច្បាប់ មិនគោរពច្បាប់ មិនឲ្យតម្លៃច្បាប់ ឬមួយគិតថា មានលុយអាចធ្វើអ្វីៗបានគ្រប់យ៉ាង ដោយមិនចាំបាច់គោរពច្បាប់ មិនចាំបាច់ឲ្យតម្លៃដល់អាជ្ញាធរមូលដ្ឋានឃុំ ស្រុកឬយ៉ាងណា?

ពាក់ព័ន្ធរបងអត់ច្បាប់ខាងលើនេះ មន្ត្រីមូលដ្ឋានមួយរួបបានឲ្យដឹងថា ម្ចាស់ដីនិងរបងនៅត្រពាំងកំភ្លាញនេះ គាត់មិនបានស្គាល់ម្ចាស់ទេ ហើយម្ចាស់ក៏អត់បានសុំច្បាប់ធ្វើរបងនឹងដែរ។

ជុំវិញបញ្ហានេះ មន្ត្រីជំនាញសាលាស្រុកអង្គស្នួលមួយរូបបានឲ្យដឹងដែរថា លោកមិនទទួលបានព័ត៌មាននោះទេ លោកសុំពេលស្រាវជ្រាវសួរនាំខាងឃុំសិន។

បើតាមប្រភពពីមន្ត្រីភូមិបាលស្រុកអង្គស្នួលមួយរូប បានបញ្ជាក់ថា របងនឹងគាត់អត់បានសុំច្បាប់ទេ។

ទាក់ទិននឹងរបងខាងលើនេះ លោក នូ សុវណ្ណារិទ្ធ អភិបាលស្រុកអង្គស្នួលបានឲ្យ Preab Messenger Tv ដឹងថា លោកឲ្យជំនាញពិនិត្យ រាយការណ៍មកលោកសិន។